Cine no MACUF da Coruña

O Museo de Arte Contemporánea da Coruña (MACUF) inicia no mes de outubro un ciclo de cine infantil: Maxia na pantalla. As tardes dos sábados poderemos gozar de películas clásicas e actuais para os máis pequenos. Dende o Museo de Arte Contemporánea buscan recuperar a esencia do cine e o hábito de acudir e gozalo en familia.

Os Goonies | 5 de outubro | 18 horas

Mikey é un rapaz de trece anos que xunto co seu irmán maior e os seus amigos, se fan chamar Los Goonies, deciden subir a xogar ao faiado da súa casa, onde o seu pai garda antigüidades. Alí encontran o mapa dun tesouro perdido que data dos tempos dos piratas. Acción sen fin para este clásico moderno do cine familiar e de aventuras.

O mago de Oz | 19 de outubro | 18 horas

Dorothy, que soña con viaxar máis alá do arco da vella, ve o seu desexo feito realidade cando un tornado lla leva co seu cadelo ao mundo de Oz. Tras ofender a Malvada Bruxa do Oeste, aconsellada pola Bruxa Boa do Norte, a nena diríxese polo Camiño Amarelo cara á Cidade Esmeralda, onde vive o todopoderoso Mago de Oz, que pode axudala a regresar a Kansas.

Regreso ao futuro | 26 de outubro | 18 horas

Marty McFly é amigo de Doc, un científico ao que todos toman por tolo. Cando Doc crea unha máquina para viaxar no tempo, un erro fortuíto fai que Marty chegue a 1955, ano no que os seus futuros pais aínda non se coñeceran. Despois de impedir o seu primeiro encontro, deberá conseguir que se coñezan e casen; pola contra, a súa existencia non sería posible.

Robin dos bosques | 2 de novembro | 18 horas

Robin de Lockley regresa a Inglaterra tras combater contra os infieis nas Cruzadas, pero Juan sen Terra, o irmán do Rei Ricardo I, usurpou o trono e goberna como un tirano, polo que o nobre saxón decide refuxiarse no bosque de Sherwood e loitar contra el para devolverlle a coroa a Ricardo.

Os mundos de Coraline | 9 de novembro | 18 horas

Baseada nunha novela de Neil Gaiman, narra a historia dunha nena que, ao atravesar unha parede da súa casa, encontra unha versión mellorada da súa vida: os seus pais son máis considerados con ela, pero as sensacións marabillosas darán paso ao medo e á angustia.

E.T. O extraterrestre | 16 de novembro | 18 horas

Un pequeno ser doutro planeta quédase abandonado na Terra cando á súa nave, ao emprender o regreso, se esquece el. Está completamente só e ten medo, pero farase amigo dun neno que o esconde na súa casa. O pequeno e os seus irmáns intentan encontrar a forma de que o pequeno extraterrestre regrese ao seu planeta antes de que o encontren os científicos e a policía.

Os contrabandistas de Moonfleet | 23 de novembro | 18 horas

John Mohune, un neno de familia nobre pero pobre, é enviado pola súa nai moribunda a Moonfleet, para que se poña baixo a protección de Jeremy Fox. O rapaz descobre que Fox, ademais de ser un antigo amante da súa nai, é o xefe dunha banda de bucaneiros. Entre os dous xurdirá unha estraña amizade e xuntos vivirán apaixonantes aventuras.
Onde viven os monstros | 7 de decembro | 18 horas

Cando Max, un neno desobediente, é enviado á cama sen cear, mergúllase nun mundo imaxinario creado por el e que está poboado por feroces criaturas que o obedecen cegamente. Adaptación dun dos contos para nenos máis vendidos do mundo, a película de Spike Jonze é unha fascinante viaxe a través da imaxinación infantil.

*Todas as sesións comezarán ás 18:00 e a entrada é libre limitada ao aforamento da sala.

MACUF na Coruña Como chegar

 

Escribe un comentario